Азық-түлік келісімшарт корпорациясы фермерлерді форвардтық қаржыландыру бағдарламасын жетілдіруге және күнбағысты үшжақты сатып алу жобасын кеңейтуге дайын.
Президенттің ауыл шаруашылығы өнімдерін өңдеуді дамыту мен өндірудің, сақтаудың және өткізудің тиімді жүйесін құру жөніндегі тапсырмасы шеңберінде Азық-түлік келісімшарт корпорациясы күнбағысты үшжақты форвардтық сатып алу жобасын іске асыруда. Биыл 19,9 мың тонна күнбағыс тұқымын жеткізуге 1,6 млрд теңгеге шарттар жасалды. Бағдарламаға Қазақстанның төрт облысынан 19 ауыл шаруашылығы өндірушілері қатысады. Жобаға өңдеу кәсіпорындары да белсенді түрде қосылды, олардың қатарында Өскемен май зауыты, Қостанай облысынан «Промбаза 7» ЖШС, Ақмола облысынан «Blik Terminal» ЖШС және «Шортамбай-2019» зауыты, сондай-ақ Солтүстік Қазақстан облысынан «Масло-Дел» ЖШС бар.
Үшжақты өзара іс-қимыл қағидатының табыстылығы – фермерлер егін өсіруге жеңілдікті қаржыландыру, өңдеушілер – қуаттарды кепілдендірілген тиеу алады, ал халық – әлеуметтік маңызы бар өнімдерге белгіленген бағамен қол жеткізеді.
«Азық-түлік келісімшарт корпорациясы» ҰК» АҚ Басқарма төрағасы Асылхан Джувашевтің айтуынша, бағдарлама тәжірибеде әлеуметтік маңыздылығын көрсетті. Көктемде компания күнбағыс майын нарықтық бағаның жартысына жуығын сатты, бұл халықты қолдауға мүмкіндік берді.
Қоғамдық кеңестің мүшесі, Қазақстанның Майлы дақылдарды қайта өңдеушілердің ұлттық қауымдастығының төрағасы Ядыкар Ибрагимовтың пікірінше, мемлекеттік қаржыландыру және тұқымдарға келісімшарт жасау көлемін ұлғайту қажет, өйткені дақыл ішкі нарықта да, шетелде де жоғары сұранысқа ие.
«Биыл Қостанай, Солтүстік Қазақстан, Ақмола, Павлодар және Абай облыстарында майлы дақылдардың егіс алқабы едәуір ұлғайды. Алдағы екі жылда елімізде қуаты 1,5 млн тонна қайта өңдеу зауыттары іске қосылады. Біздің нарықта шикізат жетіспейді, біз оның толық игерілуіне кепілдік бере аламыз», — деп атап өтті ол.
Өз кезегінде «Азық-түлік келісімшарт корпорациясы» ҰК» АҚ Басқарма төрағасы Асылхан Джувашев ұлттық оператор ынтымақтастыққа ашық және бағдарламаны кеңейтуге дайын екенін, алайда бұл үшін бірқатар мәселелерді бірлесіп шешу талап етілетінін хабарлады.
«Басты сын-тегеуріндер – көктемгі келісімшарт жасасу кезінде бағаны бекіту және зауыттардан кепілдікті қамтамасыз ету. Егер бұл мәселелер бірлесіп пысықталса, бағдарлама ауқымын кеңейте алады. Ауыл шаруашылығы өндірушілерін қолдау тетіктерін жетілдіріп, бағдарламаны барлық қатысушылар үшін барынша тиімді ету мақсатында біз Қоғамдық кеңес мүшелері мен агробизнес өкілдерінің ұсыныстарына ашықпыз», — деп түйіндеді Азық-түлік келісімшарт корпорациясының басшысы.