«Азық-түлік келісімшарт корпорациясы» АҚ және KAZAKH INVEST ұлттық компаниясының өкілдері қытайлық серіктестер – Fufeng Group Limited және Dalian hesheng Holdings Group компанияларымен инвестициялық келісімдерге қол қоюға дайындық шеңберінде ынтымақтастық мәселелерін талқылады. Тараптар ауыл шаруашылығы өнімдерін қайта өңдеу саласында ірі жобаларды іске асыру келешегін қарастырды.
Өткен жылдың соңында қытайлық Fufeng Group Limited холдингі Қазақстанда жүгеріні терең өңдеу кешенін іске қосуды ұсынды. Кәсіпорынның болжамды қуаты жылына 500 мың тоннаны құрауы мүмкін. Шикізат өндірісін қамтамасыз ету үшін Азық-түлік келісімшарт корпорациясы аграршылармен үшжақты келісімшарттар жасасуды қоса алғанда, форвардтық сатып алуды қолдану мүмкіндігін қарастырады. Ұлттық оператор астық өндірушілер тарапынан ұсыныстың көлемін анықтау үшін ауыл шаруашылығы өнімдері нарығына талдау жүргізуді жоспарлап отыр.
Екінші инвестициялық жоба бидайды өңдеумен байланысты. Қытайлық көпсалалы Dalian Hesheng Holdings компаниясы Ақмола облысында қайта өңдеу зауытын салуға ниетті. Астыққа болжамды қажеттілік жылына 1-ден 3 млн тоннаға дейін құрауы мүмкін. Осы орайда Азық-түлік келісімшарт корпорациясы өндіріс үшін шикізатты тұрақты жеткізуді қамтамасыз ету тетіктерін пысықтауда, оның ішінде қазақстандық фермерлерден бидайды форвардтық сатып алу мүмкіндіктері пайдаланылады.
Өңдеу зауыты Қазақстан ішінде және одан тыс жерлерде өткізу үшін натрий глутаматы мен амин қышқылдарын қоса алғанда, дайын өнім шығарады деп күтілуде. Экспорттың негізгі бағыттары Қытай, Оңтүстік-Шығыс Азия, Еуропа және Солтүстік Америка елдері болуы мүмкін.