Мерсин қаласында өткен Agrofood Summit 2025 аграрлық конференциясының аясында «Азық-түлік келісімшарт корпорациясы» ҰК» АҚ Басқарма төрағасының бірінші орынбасары Ильдар Исмагулов пен Түрік астық басқармасының (ТМО) бас директоры Ахмет Гулдал стратегиялық әріптестікті нығайтуға арналған келіссөздер жүргізді.
Түркия қазақстандық жасымықтың басты сатып алушысы болып табылады. 2024 жылы еліміз 141 мың тонна жасымық импорттады, ал 2025 жылдың тоғыз айында түрік нарығына осы дақылдың отандық экспортының көлемі 226,8 мың тоннаға жетті.
Әріптестер атап өткендей, қазақстандық шикізат сапасына, жеткізілім тұрақтылығына және қалыптасқан логистикалық бағдарларға байланысты тұрақты сұранысқа ие.
«Қазақстан егіс алқаптарын әртараптандыру саясатын ұстанады, ол өзінің нәтижелілігін көрсетуде. 2025 жылы бұршақ дақылдарының өнімі алғаш рет 1 миллион тоннадан асты, оның 80%-ы жасымыққа келеді. Азық-түлік келісімшарт корпорациясы ТМО қажеттіліктеріне сәйкес астық бидайын, дәнді-бұршақты және майлы дақылдарды қоса алғанда, агроөнімдердің кең сұрыпталымын жеткізуді қамтамасыз ете алады», – деді Ильдар Исмагулов кездесуде.
Ол сондай-ақ Қазақстанның астық нарығындағы ұлттық оператор ұзақ мерзімді келісімшарттар шеңберінде түрік серіктестерімен тығыз өзара іс-қимылға дайын екенін мәлімдеді.
Соңында тараптар қорларды басқару, нарықты реттеу, сатып алу науқандарын өткізу және экспорттық жеткізілімдерді ұйымдастыру мәселелерінде тәжірибе алмасты.
Түрік мемлекеттік астық басқармасы (ТМО) Азық-түлік келісімшарт корпорациясының қызметіне ұқсас функцияларды орындайды. ТМО астық өндірісін қаржыландырумен, мемлекеттік резервке бидай сатып алумен және ішкі нарықта тұрақты бағаны ұстап тұрумен айналысады.