Женевада алғашқы Kazakhstan Commodity Forum (Шикізат тауарларын сату жөніндегі қазақстандық форум) өтті, оған 200-ден астам қатысушы – ірі трейдингтік үйлердің, банктердің, логистикалық компаниялардың басшылары, инвесторлар мен халықаралық ұйымдардың өкілдері жиналды.
Іскерлік алаңда шикізат тауарларының халықаралық саудасы, көлік дәліздерін дамыту және инвестициялар тарту перспективалары талқыланды.
Форумда отандық агросекторды «Азық-түлік келісімшарт корпорациясы» ҰК» АҚ Басқарма төрағасының бірінші орынбасары Ильдар Исмагулов таныстырды. Ол қазақстандық ауыл шаруашылығы өнімдерінің елеулі әлеуетін және еліміздің әлемдік нарықтарға азық-түлік жеткізудегі өсіп келе жатқан рөлін атап өтті.
Өткен аграрлық маусымда Қазақстан экспорт географиясын едәуір кеңейте отырып, 15,3 млн тонна астық пен ұн жөнелтті. Бидай Еуропаға, Таяу Шығыс, Солтүстік Африка, Орталық және Оңтүстік-Шығыс Азия елдеріне жеткізілді. Биылғы маркетинг жылы астық өнімдерінің экспорты 12 млн тоннаға жетті.
Ильдар Исмагулов баяндама барысында хабарлағандай, жаңа өткізу арналарын іздеу және отандық ауыл шаруашылығы тауарларын сыртқы нарықтарға жылжытуға жәрдемдесу Азық-түлік келісімшарт корпорациясы қызметінің тағы бір маңызды бағыты болып табылады. Ұлттық астық операторында астықтың тұрақты жеткізілуін қамтамасыз ету үшін барлық қажетті инфрақұрылым бар. Бұл – жалпы сыйымдылығы 500 мың тоннадан асатын төрт жеке элеватор, сондай-ақ Ақтау, Амирабад және Говсан порттарындағы үш астық терминалы.
Соңғы жылдары Қазақстан Азияны Еуропамен байланыстыратын Транскаспий халықаралық көлік бағытын белсенді пайдаланады және қазақстандық өнімді алыс нарықтарға экспорттау үшін қосымша мүмкіндіктер ашады. Осы бағыт бойынша жүк тасымалдау көлемі тұрақты өсуде. Осы бағытқа қатысушы елдер жүк тасымалдау көлемін ұлғайтуда, бұл халықаралық сауданы дамытуға ортақ қызығушылықты көрсетеді.
«Біз Швейцарияны іскерлік байланыстарды кеңейту және қазақстандық агроөнімдерді жаңа перспективалы өткізу нарықтарына ілгерілету үшін перспективалы алаң ретінде қарастырамыз», – деп қорытты Ильдар Исмагулов.
Іс-шараны Қазақстанның ДСҰ жанындағы және халықаралық экономикалық ұйымдардағы тұрақты өкілдігі ұйымдастырды.
Қазақстанның ДСҰ жанындағы тұрақты өкілі Қайрат Төребаев атап өткендей, Қазақстанға деген қызығушылық шынайы әрі ол тек табиғи ресурстармен ғана байланысты емес.
«Бүгінде Қазақстан – Орталық Азиядағы ең ірі экономика, Еуропа мен Азияны жалғайтын маңызды көлік-логистикалық торап, қарқынды дамып келе жатқан аграрлық сектордың иесі, стратегиялық маңызы бар минералдарға бай ел және инвестициялар үшін жаңа мүмкіндіктер алаңы. Алайда ең бастысы – адамдар мен өзара байланыстар. Дәл осындай кездесулер жаңа жобалардың, келісімшарттардың және серіктестіктердің бастауына жол ашады. Қазақстан мен халықаралық бизнес-қоғамдастық арасында тікелей диалог орнату аса маңызды деп есептеймін», – деп атап өтті Қайрат Төребаев.
